ഇന്ത്യ : നിലവാരം കുറഞ്ഞ വാട്ടർ ബോട്ടിലുകളുടെ ഇറക്കുമതി തടയാനും ആഭ്യന്തര വിപണിക്ക് ശക്തി പകരുന്നതിനുമായി സ്റ്റീൽ, അലുമിനിയം, കോപ്പർ വാട്ടർ ബോട്ടിലുകൾക്ക് ഗുണനിലവാര മാനദണ്ഡം (ക്വാളിറ്റി കൺട്രോൾ ഓർഡർ അഥവാ ക്യുസിഒ) നിർബന്ധമാക്കുന്നു. ഇതുസംബന്ധിച്ച വിജ്ഞാപനം വാണിജ്യമന്ത്രാലയം പുറപ്പെടുവിച്ചു.
6 മാസം കഴിയുമ്പോൾ വൻകിട ഉൽപാദന കമ്പനികൾക്ക് ചട്ടം ബാധകമാകും. ചെറുകിട വ്യവസായങ്ങൾ 9 മാസം കഴിയുമ്പോൾ മുതൽ ഗുണനിലവാര ചട്ടം പാലിച്ചിരിക്കണം എന്നും വിജ്ഞാപനത്തിൽ പറയുന്നു. സൂക്ഷ്മ സംരംഭങ്ങൾക്ക് 1 വർഷം സമയം ലഭിക്കും.
ക്യുസിഒ അനുസരിച്ച് ബിഐഎസിന്റെ ഗുണനിലവാര മാനദണ്ഡം അനുസരിച്ചായിരിക്കണം ഇനി ബോട്ടിലുകളുടെ നിർമാണം നടത്തേണ്ടത്. ഇതുമായി ബന്ധപ്പെട്ട ഗുണനിലവാര മാർക്കും ഉൽപന്നത്തിലുണ്ടാകും. വാട്ടർ ബോട്ടിലുകൾക്കു പുറമേ, ലൈറ്ററുകൾക്കും ക്യുസിഒ ഏർപ്പെടുത്തിയിട്ടുണ്ട്.
