ക്രിപ്റ്റോ കറൻസി ഉൾപ്പെടെ വെർച്വൽ അസറ്റുകളുടെ ഇടപാടുകൾ രാജ്യവ്യാപകമായ സാഹചര്യത്തിൽ കൃത്യമായ നിയമവ്യവസ്ഥകൾ സംബന്ധിച്ച മാർഗനിർദേശം, ഡിജിറ്റൽ ആസ്തികൾ കൈകാര്യം ചെയ്യുന്നവർക്ക് അധികൃതർ പുറപ്പെടുവിച്ചിരിക്കുകയാണ്. ലൈസൻസില്ലാതെ ഡിജിറ്റൽ ആസ്തികളുമായി ബന്ധപ്പെട്ട ഇടപാടുകൾ നടത്തുന്ന സേവനദാതാക്കൾക്കാണ് മുന്നറിയിപ്പായി മാർഗനിർദേശങ്ങൾ പുറപ്പെടുവിച്ചിരിക്കുന്നത്.
യു.എ.ഇ സെൻട്രൽ ബാങ്കിന്‍റെ കള്ളപ്പണവിരുദ്ധ ബ്രാഞ്ചാണ് കഴിഞ്ഞ ദിവസം പിഴ ഉൾപ്പെടെയുള്ള നിയമവ്യവസ്ഥകൾ സംബന്ധിച്ച വിജ്ഞാപനം ഇറക്കിയത്. ലൈസൻസില്ലാതെ ഡിജിറ്റൽ ആസ്തികൾ കൈകാര്യം ചെയ്യുന്ന സ്ഥാപനങ്ങൾ, ഉടമകൾ, സീനിയർ മാനേജർമാർ എന്നിവർ പിഴ ഉൾപ്പെടെ സിവിൽ, ക്രിമിനൽ നടപടികൾക്ക് വിധേയമായിരിക്കുമെന്നാണ് വിജ്ഞാപനത്തിൽ പറഞ്ഞിരിക്കുന്നത്. ലൈസൻസില്ലെന്നറിഞ്ഞിട്ടും വെർച്വൽ അസറ്റ് ഇടപാട് നടത്തുന്ന സ്ഥാപനങ്ങളുമായി ഇടപാടുകൾ നടത്തുന്നവർക്കെതിരെയും കള്ളപ്പണം വെളുപ്പിക്കൽ, മറ്റ് നിയമ വിരുദ്ധമായ ധനസഹായം നൽകൽ എന്നിവക്കെതിരെയും പുതിയ വ്യവസ്ഥ പ്രകാരം കനത്ത പിഴചുമത്താം.
രാജ്യത്തിന്‍റെ സാമ്പത്തിക സംവിധാനത്തിന്‍റെ അഖണ്ഡത ഉറപ്പുവരുത്താനായി നടപ്പിലാക്കിയ പ്രധാനപ്പെട്ട നിയമങ്ങളും നിയന്ത്രണങ്ങളും പാലിക്കേണ്ടതിന്‍റെ പ്രാധാന്യം വ്യക്തമാക്കുകയും എല്ലാതരം സാമ്പത്തിക കുറ്റകൃത്യങ്ങൾക്കെതിരെയുമാണ് രാജ്യത്തിന്‍റെ പ്രവർത്തനമെന്ന് ബോധവത്കരിക്കുകയുമാണ് ഇതിലൂടെ ലക്ഷ്യമിടുന്നതെന്നും അധികൃതർ വ്യക്തമാക്കിയിട്ടുണ്ട്.
